ناميز

حشرية ... دي ولية مفترية
دماغها مهرية
فاكره ان بس هي
اللي ليها حق في الدنيا دي
الاسم مش حقوله plz
بس هي شبه المعيز
فيها من العبر كتير
و لو بصت فمرايا
تقول ... يا حفيظ
تبص لها تلاقي ملاك ...
وهي فالاصل كيدها عظيم
بتحب سيره الناس جدا و تموت فالنميم
مبيحوأش ولا بينفع معاها قران ولا حتى ترانيم
تتكلم معاها ... لازم تستعيذ من الرجيم
و حتى لو قلبك رحيم
كل اللي هيبقى فنفسك تديها ألم
وسط الناس و الزحمه و العلم
ممكن تفوق
و من شدة الندم
وتسيب الناس تعيش من غير ألم
بس مظنش أصلها ناميز

أمل كداب

على طريق سفر ماشيين عالسريع
الطريق كان هادي في حتت و حتت تانيه فظيع
ماشيين جوا السنين..تايهين
راكبين عربيات الحنين
في شوارع وحارات كلها انين
وسط الحارات لمحت حاجه غريبه
في عده ثواني بس كانت عجيبه
واحد ماشي وسط الطريق
شكله مجنون بس بريء
هدومه مقطعه و مش مركز
ماشي عدل و عالهوا بيتعكز
عدينا عشان كنا بسرعه
فضلت باصص عليه
ملقتوش ..
يمكن شاور و مشفتوش
او نادى و مسمعتوش
او سراب و ملحقتوش

فايق وسط مساطيل

بعد يوم طويل .. قررو انهم يبقو من المساطيل .. صاحبنا قال طب ما تكلم deal.. لحسن اليوم لسه طويل .. و مش عايز يعدي علينا الليل .. كلمنا dealليقيناه مشغول .. قلنا نروحله على طول .. مكانه اللي بيقعد فيه فالكيت كات .. حيث الحشيش و الحركات .. من حاره لحاره .. ماشيين فمتاهات لحد ما وصلنا عند الكرف .. هو كان اسمه كدا بالحرف .. لابس عمه و جلبيه من غير طرف .. قاعد فميدان و عليه الناس كانت زحمه .. اللي عايز نص و اللي عايز ربع ولا كأنهم بيشترو لحمه .. تقريبا كدا مكنش في حاجه الا عنده .. و عشان كدا كان بيتنك عاللي عنده .. سعر النص باربعين هو بيبيعو بستين .. استغلال بقى بس تعالو نفكر هو بيجيبو منين .. و ازاي محدش عارف يوصله منين .. مع ان الحكومه ليها عينين .. خلاصه القول صاحبنا جاب ابو ستين .. و رجع من الكيت كات و معاه بفره و سجاير و kitkat( شوكولاته ) .. لزوم التعليه و الدماغ .. سألوني و انا اللي مابشربش .. معاك مكتب ؟؟ قلت معرفش .. قالولي اي ورقه نرول عليها .. قلتلهم ادورلكو بس من غير هرش .. في شنطتي لقيت ورقه فركو عليها المعلوم .. قاللو خد ولع .. قاللو لا من رل اشعل .. شويه و قاله ايه هو انت ماسك حرامي .. ماتسيبو لاخوك شويه دا الكيف مناوله .. صاحبنا قاله اسكت دا بقى مقاوله .. اااه الدماغ دي قويه و تحيه للامه العربيه .. هوصل للكوشك اللي عند الكليه .. يمكن افوق .. و التهييس اشتغل و الدماغ بقت فوق .. و اتاريني ماسك الهوا بايدايا ماسك الهوااااا ...

فترينا بعجل

ماشي انا ماشي
تعبت ..
قمت ركبت
بتاعه حديد فحديد
المفروض انه شديد
بيدحرج على كاوتش مدور
واقف على بابها واحد بيدور
على ناس بيهم يتنور
جواه كراسي مرصوصه
عليها ناس محبوسه
ماشي فطريقه طوالي
عدت ساعه و حوالي
وقف قال و انا مالي
في بتاع اسود فابيض
تقريبا حواجز
ممكن اكيد مش جايز
و في واحد بنجوم
بيلف و يحوم
على حاجه تعجبه
يقضي بيها اليوم
شاف واحد غرقان فالنوم
و واحد من الحر كان نفسه يعوم
و واحد من كتر الجوع كان احسن له يصوم
و رابع زعلان و مهموم
ابو نجوم عجبه المهموم
عشان يكمل بيه تسليه اليوم
سأله انت ليه ؟؟
رد و قاله هو في ايه !!
قاله من غير ليه
قال مش كفايه اللي انا فيه
رد الجاحد و قال مش كفايه
عشان هي دي البدايه
رد تاني يا ريتها كانت النهايه
العجل المدور اتدور
و الناس كلها بتدور
المهم يعني معملش حاجه
لكن مكانه دلوقتي ورا النجوم
الباقي قال و انا مالي
خليني احسن فحالي…